8-nji dekabrda Russiýanyň prezidenti Wladimir Putin Kremlde raýat jemgyýetini we adam hukuklaryny ösdürmek geňeşiniň mejlisini geçirdi. Duşuşykda daşky gurşaw, telekeçilik däl guramalaryň (TDG) we jemgyýetçilik gözegçilik komissiýalarynyň işi, şeýle hem ekstremizmiň öňüni almak bilen baglanyşykly meseleleriň arasynda rus watandaşlarymyzyň ýagdaýy meselesi gozgaldy.

Geňeşiň başlygynyň orunbasary Ýewgeniý Bobrow, prezidentiň ünsüni Russiýada uzak wagtlap ýaşamak üçin rugsady ýa-da raýatlygy bolmadyk watandaşlaryň ýagdaýyna gönükdirdi we olara ýaşamak üçin rugsatnamalaryň ýönekeýleşdirilen tertibi, şeýle hem rus dilinde gürleýänler we watandaşlary göçürmek boýunça döwlet maksatnamasyna gatnaşyjylar üçin raýatlyk almagyň tertibini ýönekeýleşdirmek üçin migrasiýa amnistiýasyny geçirmegi teklip etdi.

Ý. Bobrow öz hasabatynda goşa rus-türkmen raýatlygynyň eýeleriniň we Türkmenistanda ýaşaýan “bipatridleriň” rus raýatlygy hukugyny goramak meselesini aýratyn belläp geçdi.

Ynsan hukuklaryny goraýjy W.Putine ýüzlenip: “Türkmenistanyň prezidenti Berdimuhammedow bilen geçen ýyl baglaşan ylalaşygyňyzyň tersine, ruslaryň hukuklarynyň bozulmagy henizem dowam edýär. Olara Russiýanyň raýatlygyndan ýüz öwürmeseler, täze pasportlar berilmeýär. Bu bölümde sizden, Russiýanyň raýatlygyndan ýüz öwürmeginiň öňüni almak we daşary ýurt pasportlarynyň hem kynçylyksyz berilmegi üçin kömek soraýarys."