Aşgabat, 21-nji maý 2010-njy ýyl (Azatlyk Radiosy) - Türkmenistanyň Aşgabatdaky Migrasiýa işleri bölümi wizasynyň bardygyna garamazdan, “Azatlyk” Radiosynyň žurnalistine ýurda girmegini gadagan etdi.

Pragada ýerleşýän “Azatlyk” Radiosynyň žurnalisti, milleti boýunça türkmen bolan Allamyrat Rahymow (19-njy maý) çarşenbe güni irden maşgalasynyň çakylygy esasynda berlen wiza bilen Aşgabat howa menziline geldi.

Kanadanyň raýaty Rahymow Marynyň günorta-gündogaryndaky dogduk obasyna dynç alyşa barýardy. Ol, 11 ýyl bäri Türkmenistanda bolmady we maşgalasyny şu wagta çenli görüp bilmedi.

Emma howa menzilinde oňa giriş gadagan edildi we derrew uçar bilen Praga iberildi.

Türkmenistana girmäge gadanlygyň sebäbi entek belli däl. Rahymow Migrasiýa ministrliginden "Türkmenistana girmeginiň gadagan edilendigi" barada hat aldy. Onuň pikiriçe, Türkmenistana girmäge gadaganlygyň sebäbi onuň “Azatlyk” Radiosynyň žurnalisti hökmünde işlemegi bilen baglanyşykly.

Rahymow 2003-nji ýyldan bäri “Azatlyk” Radiosynyň Türkmen gullugynda işleýär.