ÝHHG düýn 12-nji fewralda geçiriljek prezident saýlawlaryna synçy ibermejekdigini aýtdy.
2011-nji ýylyň dekabrynda ÝHHG-nyň wekilleri ýurtda saýlawlara nähili taýýarlyk görülýändigini we saýlawlara gatnaşsalar synçylaryň nähili mümkinçilikleriniň boljakdygyny görmek üçin Türkmenistana geldi. Gurama öz beýanatynda saýlawlara synçylaryň gatnaşmagynyň häzirki wagtda düýpli üýtgeşiklik döretmejekdigini aýtdy.
Şeýle-de bolsa, beýannamada türkmen häkimiýetleriniň gepleşikleri dowam etdirmäge gyzyklanma bildirýändiklerini göz öňünde tutup, saýlawlaryň kanuny we administratiw taraplaryny has giňişleýin öwrenmek we käbir sebitlere baryp görmek üçin ýurda baha beriş missiýasynyň iberiljekdigi aýdylýar. ÝHHG Türkmenistanda saýlawlaryň demokratik geçirilmegi barada teklipler bermek isleýändigini mälim etdi. Ondan öň ÝHHG hiç wagt Türkmenistanda geçiriljek parlament we prezident saýlawlaryna synçy ibermedi.
